Петмина членови на тимот за одговор и дејствување при катастрофи од Општинската организација на Црвен крст, Крива Паланка изминатите три дена учествуваа на меѓународна тренинг-обука за дејствување во случај на природна непогода-поплава, брзи реки.
– Надоврзувајќи се на одличната соработка со ОО на Црвен крст Ќустендил Република Бугарија, членови на тимот за одговор и дејствување при катастрофи од нашата општинска организација учествуваа на меѓународна тренинг-обука за дејствување во случај на природна непогода-поплава, брзи реки. Обуката се одржа во бугарската општина Бобошево, каде заедно со тимовите за одговор и дејствување при катастрофи од Ќустендил и Ниш, нашите волонтери од тимот имаа можност да ги надградат своите вештни и познавања во оваа област и извлекуваа жртви од поплави на лице место, изјави Дарко Пешовски, секретар на ОО Црвен крст, Крива Паланка.
Тимот од ОО на Црвен крст брои 13 члена, а истито е дел од националниот тим за одговор и дејствување при катастрофи при Црвен Крст на РМ за работа со пречистителни станици и обезбедување чиста и питка вода во случај на полави.
– Во оваа област тимот имаше можност да дејствува при несаканите полави во скопскиот регион лани. Исто така, нашите волонтери зимава ги опслужуваа жителите на Крива Паланка и Ранковце од завеаните подрачја при големите студови и наносите од снег, а најкарактеристичен беше случајот со евакуација на завеаните албански државјани на магистралата А2, при што го активиравме планот за евакуација и сместување, ги сместивме во ученичкиот дом Боро Менков од градот, а по стабилизација, истите беа отпратени до нивната следна дестинација, дополни Пешовски.
Во наредниот период активностите на Кривопаланчани ќе продолжат на меѓународно ниво, со предвидената обука за одговор и дејствување при пожари.