Министерот за надворешни работи на Република Македонија Никола Димитров од денеска до 3 ноември ќе престојува во работна посета на балтичките земји. Регионалната турнеја, како што соопшти МНР, ќе започне во Република Естонија, актуелниот претседавач со Советот на ЕУ, ќе продолжи во Република Латвија, а ќе заврши со работна посета на Република Литванија.
Во рамките на посетата министерот на своите балтички колеги ќе им ги претстави досега преземените конкретни чекори од страна на Владата на Република Македонија за поттикнување на евроатланските интегративни процеси на земјата, преку Акцискиот план 3-6-9, а ќе ги информира и за степенот на реализацијата на преземените реформи.
Министерот Димитров, се вели во соопштението од МНР, ќе се осврне и нa најновите надворешно-политички активности на земјата во контекст на продлабочување на регионалната соработка и градењето добрососедски односи за изнаоѓање одговор на актуелните глобални безбедносни предизвици и регионалната економска соработка.
Се очекува на средбите да бидат разменети мислења и идеи околу понатамошно интензивирање на политичкиот дијалог и унапредување на билатералните односи преку соработка во области од заемен интерес.