ВМРО-ДПМНЕ во реакцијата на соопштението на СДСМ за кратење на платите на опозициските пратеници кои го бојкотираат Парламентот наведува дека опозициската партија го покажува своето вистинско лице.
– Најостра и најжестока реакција СДСМ прати поради најавата за кратењето на платите на пратениците, кои што најавија бојкот на Собранието. СДСМ не реагираше кога нивните пратеници кршеа државен имот, кој директно е платен од граѓаните, кога нападнаа претседател на Собрание, се закануваа на пратеници и ги покриваа собраниските камери, за граѓаните да не го видат нивното сценарио, се наведува во соопштението.
СДСМ, како што посочуваат од владејачката партија, е најнеповикан да зборува за парламентарна демократија по сите изјави и повикувања за насилнички сценарија и рушење на власт од улица, а не на демократски парламентарни избори, како во секое демократско општество.
– Платите за пратениците се од граѓаните и тие плати се за пратениците да си ја извршуваат својата работа предвидена со Устав и Закон. СДСМ треба да престане со креирање сценарија, кои се на штета на Република Македонија, повикува ВМРО-ДПМНЕ.
