„Во врска со денешното известување од Собранието на Република Македонија во кое се најавени повеќе мерки кон пратениците на опозицијата, го соопштуваме следното:
– Прво, Трајко Вељаноски нема никаков кредибилитет и легитимитет да се повикува на Закон, или да парадира со каков било правен основ, бидејќи тој самиот е извршител на досега невидено политичко самоволие и брутално насилство со кое беше погазен Уставот и парламентарната демократија. Оттука, било каква негова одлука, изјава или соопштение за нас е беспредметна затоа што доаѓа од Собрание, кое после “црниот понеделник“ постои само на хартија.
– Второ, го повикуваме режимот да продолжи и понатаму со партиско полицискиот пуч, слободно нека спроведуваат фингирани истраги, нека бегаат од сопствената одговорност, нека продолжат да глумат дека се е нормално во државата, нека превземаат мерки против опозициските пратеници. Кратењето на платите е мала цена за демократија, слободата и политичката борба за враќање на Македонија во вистинска насока. Опозициските пратеници доследно ќе продолжат да ги преставуваат граѓаните кои сакаат поинаква Македонија од онаа на Никола Груевски и “фамилијата“.
– Трето и конечно, му порачуваме на Трајко Вељаноски, барем за момент да размисли и да се обиде да сфати дека времето не завршува со истекот на овој мандат, а државата не завршува на прагот на седиштето на ВМРО ДПМНЕ. Нека помисли малку на својата поширока одговорност и нека потроши малку повеќе време во подготовката на својата правна одбрана за делата против Уставот и Законите.
– Во меѓувреме, се’ што Трајко Вељаноски ќе каже, може и ќе биде употребено против него во соодветна постапка“, се вели во соопштението на СДСМ во врска со денешното известување од Собранието на Република Македонија.