Поранешниот фудбалер Џорџ Веа освои најмногу гласови во првиот круг од претседателските избори во Либерија, покажуваат конечните официјални податоци, соопштени од Изборната комисија.
Околу 600.000 гласачи гласаа за Веа, или 38,4 отсто од гласовите. Неговиот главен ривал – потпретседателот Џозеф Боакај – е на второ место со 28,8 проценти од гласовите. Тие ќе ја продолжат претседателската трка во вториот круг, што ќе се одржи следниот месец.
Адвокатот Чарлс Брумскине и поранешниот командант од граѓанската војна Принс Џонсон се на трето и четврто место, со освоени 9,6, односно 8,2 проценти од гласовите.
Во првиот круг учествуваа вкупно 20 кандидати. Одѕивот изнесуваше 75,2 проценти.
На парламентарните избори, спроведени паралелно со гласањето за претседател, победи Коалиција за демократска промена, предводена од Веа, која освои 21 пратеничко места. Владејачката Партија на единството на актуелниот претседател Елен Џонсон-Сирлијф доби 18 места во 73-члениот Долен дом на парламентот.
Џорџ Веа, своевремено беше еден од најдобрите фудбалери во светот, има освоени повеќе титули во Италија и Франција, прогласен е за африкански фудбалер на векот и е првиот играч од Африка кој ја доби Златната топка.
Веа кој во кариерата настапуваше за Челси, Манчестер Сити, Монако, ПСЖ и Милан, откако ја заврши фудбалската кариера, се посвети на политиката.