Претседателот на СДСМ Битола, Васко Ковачевски денеска во изјава за медиуми рече дека според конечните, а неофицијални резултати кандидатката за градоначалник на Битола, Наташа Петровска добила 31.337 гласови или речиси 60 отсто, а нејзиниот конкурент од ВМРО-ДПМНЕ, Зоран Илиоски имал 17,715 или 34 отсто.
– Разликата од речиси 14.000 гласови, ја потврдува победата во прв круг на новата Градоначалничка Наташа Петровска. Советничката листа на СДСМ и коалицијата предводена од Валентин Груевски доби поддршка од 26.555 гласачи или 51 отсто, а листата на ДПМНЕ 17.481 глас или 33 отсто. Бројките го покажуваат и односот на силите во новиот Совет на Општина Битола. СДСМ и коалицијата ќе имаат стабилно мнозинство со 17 советници, наспроти ДПМНЕ со 11 советници. Во Советот ќе партиципираат и 2 советници од независната листа и 1 советник од листата на албанските партии, рече Ковачевски.
Тој додаде дека ваквите бројки од изборите покажуваат дека во изминатите 12 години претходниот градоначалник и партијата на власт воделе погрешки политики во Битола.
– Ја унишија Битола и ја добија казната од битолчани, рече Ковачевски.
Тој изрази голема благодарност до сите кои ги поддржале и кажа дека тоа значи голема обврска за реализација на ветувањата од изборната програма, но и одговорност за да се врати Битола на местото каде што заслужува.