Новата локална самоуправа ќе се грижи за сите основи и средни училишта, ќе ги помага и зајакне, најави денеска Наташа Петровска, кандидатот за градоначалник на Битола од СДСМ и коалицијата.
– Ќе обезбедиме енергетска ефикасност во училиштата преку сончеви колектори со средства од надворешни фондови, ќе извршиме изградба, реновирање и опремување на спортските сали и спортските терени, бидејќи најголем дел од училиштата имаат очајни терени. Ќе ги зајакнуваме капацитетите и врската на локалната самоуправа со училиштата и нема како досега општината да контактира само со директорите на основните и средните училишта, туку ќе направиме поширока рамка за комуникација со наставниот кадар и градоначалникот со што подобро ќе се детектираат проблемите и ефикасно ќе се решаваат, рече Петровска.
Таа најави и опремување на кабинетите и библиотеките во училиштата, набавка на интерактивни табли и доделување помош на најранливата категорија граѓани за да можат нивните деца подготвени и без проблеми да ја почнуваат учебната година.
– Ќе одржуваме летни кампови, курсеви и семинари кои ќе ги оплеменат знаењата на учениците посебно за еко-културата и сообраќајната култура. Ќе се укине т.н. наменски денар кој досега беше на товар на родителите, а сега трошоците за обезбедување во училиштата ќе бидат на товар општината. Ќе помагаме на родителите кои имаат деца со посебни потреби, бидејќи и тие се деца како и сите други деца во нашиот град, потенцира Петровска.