Ние ветераните од ВМРО-ДПМНЕ се решивме активно да се вклучиме во сите активности на реформаторите. Промените се природна појава и се што тргнало мора да се заврши, изјави пратеничката од првиот состав на ВМРО-ДПМНЕ, Ѓулистана Марковска.
– Добро е ВМРО-ДПМНЕ одреден период да биде дел од опозиција за да сфати каде греши и да ги поправи тие грешки. Ние не бараме ВМРО-ДПМНЕ да се расцепи, туку само бараме реформи внатре во партијата, односно оставка од претседателот Никола Груевски и уште некои луѓе од врвот на самата партија, рече Марковска.
Според ветеранот и еден од првите членови на ВМРО-ДПМНЕ, Михаил Пановски, државнички потег е партијата да се реформира со што ВМРО-ДПМНЕ ќе почне да гради соживот со Албанците и соработка со САД и ЕУ.
– Како членови на првиот повеќепартиски парламент го препознавме државниот интерес, ВМРО-ДПМНЕ да се реформира и да го фати евро-атланскиот курс, како и да најде албанска партија за коалиција, како би се вратила повторно на власт, рече Пановски.
Виктор Јованов