Организирање на мултифункционален детски фестивал, меѓународен фолклорен фестивал, формирање на ликовни, драмски и играорни секции во сите училишта на локално ниво, се дел од проектите од областа на културата што на денешната прес-конференција ги најави кандидатот за градоначалник за Куманово од ВМРО-ДПМНЕ Зоран Ѓорѓиевски.
Тој истакна дека општината ќе продолжи да ги поддржува културните манифестации како што се „Денови на комедијата“, „Рома труба фест“, „Тамбурашки фестивал“, а ќе им дадат можност и на уметниците од градот да се промовираат.
– Една од новините ќе биде отворена сцена во летните месеци за сите соло уметници, рок, џез музичари да имаат катче на плоштадот во Куманово каде ќе ги промовираат своите културни, музички и ликовни способности, писателски, поетски…, така што ќе им дадеме шанса на сите оние луѓе да можат да направат самопромоција во градот од таму од каде што потекнуваат.
Кандидатот за градоначалник Ѓорѓиевски ги повика граѓаните на Куманово масовно да го посетат вечерашниот митинг на коалицијата „За подобра Македонија“ што ќе се одржи на градскиот плоштад со почеток во 20:30 часот.