На почетокот на втората недела од кампањата за претстојните локални избори, кандидатот за градоначалник на општина Аеродром од ВМРО-ДПМНЕ, Ивица Коневски денеска во населбата „Јане Сандански“ промовира проект за целосна реконструкција на сервисните улици меѓу зградите во оваа населба, како и обележување на нови паркинг места.
– Доколку ја добиеме довербата од граѓаните, во оваа населба ќе реализираме и низа комунални проекти што ќе го подобрат квалитетот на живот, меѓу кои поправка на плочниците меѓу зградите и оштетените пешачки патеки, рече Коневски.
Со оглед на фактот, како што додаде, што овој дел од општината изобилува со зеленило ќе биде изграден систем за наводнување за да се олесни неговото одржување.
– И во делот на спортот и образованието, предвидена е реконструкција на подовите во ОУ „Љубен Лапе“, кое се наоѓа во оваа населба, реконструкција на детските и спортските игралишта, како и изградба на парк за миленици, рече Коневски.
