Преку намалување на административните општински процедури и воведување на регистар за компании, кандидатот за градоначалник од редовите на ВМРО-ДПМНЕ, за Кисела Вода, Јохан Тарчуловски денеска повторно ја побара довербата на граѓаните.
„Како иден градоначалник на општина Кисела Вода максимално ќе се заложам за подобрување на условите за водење бизнис и подобар економски стандард на жителите. Ќе донесеме Детален урбанистички план за делот кај Стаклара и Охис. Во соработка со Град Скопје ќе ja завршиме четвртата фаза од најфрекфентниот Булевар „Борис Трајковски“ и тоа од потегот Пинтија до Маркова Река. Ќе ја подобриме инфраструктурата во индустриските зони, со што Општина Кисела Вода, ќе стане поатрактивна како за домашните така и за странските инвеститори“, рече Тарчуловски, претставувајќи ги проектите од неговата програма.
Доколку Тарчуловски ја добие довербата на граѓаните од Кисела Вода, тој вети и организирање на бесплатни обуки и курсеви за жителите, посредување при вработување во компаниите кои гравитираат на територијата, а ќе отвори и деловно-технолошки инкубатор, кој ќе има цел да обезбеди помош на невработени млади лица до 29 години кои имаат иновативни проекти.
К. Ландов