Со формирањето на Владата и со проектите и политиките кои извршната власт започна да ги спроведува го подобруваме жиивотот на сите граѓани во Македонија. Сега ни треба поддршка и на локално ниво, за да продолжиме со исполнување на нашите ветувања и предвидени политики, за решавање на проблемите во нашата најблиска средина, нагласи Зоран Ангелов носителот на листата со кандидати за членови на Советот на општина Гостивар на прес-конференција.
Ангелов во своето обраќање потенцираше дека како коалиција ќе ги поддржат демократските процеси, за да, како што рече, се подобри животот на сите во Гостивар.
– Нашата советничка група преку Советот ќе обезбеди повеќе пари, а со тоа и повеќе можности и повеќе пари за секој граѓанин на локално ниво. Ние активно ќе ги поддржуваме сите демократски механизми како петиции, претставки, граѓански иницијативи, собири на граѓани и референдуми, ќе ја отворииме локалната самоуправа за да може секој граѓанин да добие навремени, квалитетни и евтини услуги. Гостивар ќе биде отворена и услужна општина за сите, рече Ангелов.
Ангелов се осврна и на конкретните проекти и ги наброја позначајните како што се: решавање на проблемот со депонијата Русино преку јавно-приватно партнерство и овозможување на изградба на фабрика за рециклирање на отпад во месноста викана Краста. Покриен пазар за секојдневните потреби на граѓаните, замена на старите азбестни водоводни цевки и изградба на пречистителна станица за отпадни води. На крајот тој ги повика граѓаните да гласаат за советничката листа со реден број 19.
