Во однос на неодамнешните шпекулации кои се однесуваат на Фени Индустри А.Д., Кавадарци, сакаме да ги дадеме следните информации, известуваат од компанијата.
„Компанијата се соочува со проблеми од 2015 година поради ниската цена на никелот на светско ниво која веќе неколку години е во континуиран пад. Ситуацијата дополнително беше отежната со блокада на нашата сметка од страна на банка, и покрај претходните договори и вложување на големи напори во преговори за изнаоѓање најдобро и најоптимално решение за ситуацијата.
Поради блокадата на сметката сега имаме проблеми со дневните плаќања и кон други доверители, добавувачи, банки и компаниите кои не снабдуваат со руда, што доведе и до тоа некои од нив да покренат извршни постапки со кои единствено се оневозможува опремата да се продава, но истата е во функција, а со тоа и Комбинатот, односно производните линии се во функција.
Напоменуваме дека досега платите на сите вработени се исплаќаа редовно и сметаме дека работењето на компанијата и егзистенцијата на вработените се уште не се доведени во прашање. Работиме напорно и се надеваме дека брзо ќе се реши ситуацијата, односно дека банките и компаниите ќе ни излезат во пресрет, за да можеме да ја санираме состојбата и да го одржиме Комбинатот во функција“ се вели во соопштението на Фени.
Претходно вицепремиерот за економски прашања, Кочо Анѓушев изјави дека Владата е посветена и интензивно разговара и со сопственичката структура на „Фени“ и со менаџерскиот тим на „Фени“ за да изнајде решение како овој проблем да биде разрешен.
– Вистина е дека „Фени“ има финансиски тешкотии, компанијата беше блокрана на Силк роуд банката и од други банка. Следна блокада дојде од добавувачот на руда од Албанија. Фени е голем индустриски каацитет и Владата ќе направи сè за „Фени“ да продолжи да работи – рече вицепремиерот и истакна дека „Фени“ е голем и значаен индустриски капацитет.