Невенка Стаменковска од ВМРО-ДПМНЕ денеска во изјава за медиумите рече дека ДИК има обврска да постапи согласно законот со кој е гарантирано референдумско изјаснување на граѓаните за работите кои директно ги допираат нивните интереси и дека не смее во никој случај да го попречува одржувањето на локалните референдуми кои граѓаните побарале да се одржат против изградбата на мигрантски кампови.
– Истовремено го повикуваме СДС да не врши протисок врз ДИК во врска со организирањето на локалните референдуми. СДС не смее да го попречува организирањето на референдуми само за да го оствари својот план Македонија да ја направи еден голем бегалски камп. ДИК е формирана и платена од граѓаните на Република Македонија за да го гарантира правото на слободно изјаснување. ДИК е институција која е должна да ги штити интересите на граѓаните на Република Македонија на тој начин што ќе им овозможи непостредно да се изјаснат дали сакаат мигрантски населби во нивната општина. Референдумското изјаснување на граѓаните е највисок облик на непосредна демократија, во кој секој граѓанин на непосреден начин може да го искаже својот став по однос на определено прашање, рече Стаменковска.
Таа додаде дека очигледно владата на СДСМ повеќе ја интересирале мигрантите отколку граѓаните на Македонија и дека планирале да населат повеќе илјади мигранти и да им овозможат социјална помош, право на стан и работно место со што ќе се разнишала македонската економија, но и образование, здравствен и социјален систем.
– Македонија е држава со скромни финасиски средства и ресурси, и висока невработеност, со многу нерешени проблеми, владата на СДС наместо да мислат како и со што да им го подобрат животот на граѓаните, тие се одлучија од државата да направат еден огромен камп за мигранти, со изградба на станови во скоро секоја општина. Во такви услови на владата на СДС не и се приоритет граѓаните на Република Македонија. Ова е многу значано прашање и за идните генерации и владата на СДС и ДИК мораат да им овозможат на граѓаните на Република Македонија непосредно да се изјаснат, рече Стаменковска.
Таа додаде дека СДСМ наместо да се грижи за граѓаните, се грижеле за мигрантите кои Македонија нема реална можност и капацитет да ги згрижи и поради тоа граѓаните ќе го казнеле СДСМ на престојните локални избори.