Денеска во Министерството за внатрешни работи се одржа работен состанок на кој беа презентирани постигнатите резултати и беа договорени идните чекори во спроведувањето на проектот „Јакнење на националните капацитети за борба против организираниот криминал и корупција“, финансиран со средства од ИПА програмата за 2012.
Состанокот беше воден од страна на државниот секретар во Министерството за внатрешни работи, Магдалена Несторовска, а присуствуваа и заменик министерот за правда Оливер Ристовски како и повеќе директори и раководни лица од институциите вклучени во имплементацијата на проектот (Државна комисија за спречување на корупција, Агенција за одземен имот, Управа за финансиска полиција, Управа за финансиско разузнавање, Основно јавно обивинителство за гонење на организиран криминал и корупција, Царинската Управа). Покрај нив со свои претставници учествуваше и Делегацијата на Европската Унија во Република Македонија.
Несторовска рече дека резултатите од овој проект се од исклучителна важност за Република Македонија како држава, земајќи во предвид дека активностите се дел и од Планот 3-6-9 на Владата на Република Македонија во делот кој се однесува на спречување на организиран криминал и корупција.
На состанокот беа донесени следните заклучоци:
Сите институции активно да се вклучат во понатамошната имплементација на проектот со засилено темпо
Да се зголеми меѓуинституционална соработка помеѓу вклучените страни во проектот и
Да се даде целосна поддршка од страна на сите лица кои се директно вклучени во имплементацијата на активностите. Истите активно да се вклучат со свое мислење и искуство во креирањето и изготвувањето на документите кои се предвидени да се изработат во рамките на проектот и
Секаква поддршка и помош која ќе биде дадена од страна на проектот во делот од на спроведување на предвидените цели со Планот 3-6-9 ќе биде добредојдена.