Пратеничка група на ВМРО-ДПМНЕ денеска во Собранието поднесе интерепелација за работата на министерот за финансии Драган Тевдовски.
– Како клучни причини за поднесување на Интерпелацијата за работата на Тевдовски го потенцираме целосно неразвоен ребаланс на Буџетот за 2017 година, значителното намалување на капиталните расходи, засилено и неосновано задолжување на граѓаните на домашниот пазар, зголемување на износот предвиден за задолжување на меѓународните финансиски пазари, непочитување на народните претставници во Собранието на Република Македонија и манипулирање со економски податоци, параметри и индикатори, изјави пратеничката Лилјана Кузмановска од ВМРО-ДПМНЕ.
Според Кузмановска, Тевдовски не ја оправдал довербата дадена од Собранието. Единствено се грижел за обезбедување средства со кои, како што рече Кузмановска, на големо се спроведуваат партиските вработувања во државните и јавни институции додека потребите на граѓаните воопшто не се ни разгледуваат.
– Поради демонстрираното незнаење и неспособност да ја извршува оваа функција сметаме дека е потребно што поскоро Драган Тевдовски да замине од функцијата министер за финансии и на негово место да дојде способен министер кој нема да прави катастрофални грешки во работењето, рече Кузмановска.