Најчестите заразни заболувања кои се јавуваат во летниот период, ентероколити, бележат тренд опаѓање на подрачјето на општините Крива Паланка и Ранковце, информираат од Подрачната единица на Хигиено-епидемиолошка служба на Центарот за јавно здравје, Крива Паланка.
Во двете општини од почетокот на летото се регистрирани вкупно тринаесет случаи од ова заразно ваболување.
-Ентероколитите како заразно заболување е најчесто во летниот период, а периодов за среќа нема регистрирано поголем број заболени. Од вкупно 13 случаи со стомачни заболувања во јуни и јули, само еден случај е од Ранковце, додека 12 се од Крива Паланка, сите од различни возрасни групи. Најголем процент се ученици, но има и по некој случај кај пензионери. Што се однесува до полот, заболувањето е потврдено кај осум лица од машки и пет од женски пол, изјави доктор Елена Крстевска од ПЕ на ХЕС, Крива Паланка.
Во однос на лекувањето, нема хоспитализирано ниту едно лице, а сите по медицински третман и препишана терапија биле пуштени на домашно лекување.
– Споредено со истиот период минатата година, бројот на цревни и стомачни заболувања е намален за 38 отсто. Во 2016 година во месеците јуни и јули, во двете општини биле регистрирани 21 случај на лица со енероколити, додаде Крстевска.
Рече, следењето на состојбата со цревни заболувања периодов продолжува, со оглед на тоа што сезоната се уште трае.