Издашноста на изворите од Калин Камен од каде што Крива Паланка се снабдува со вода за пиење е намалена, информираат надлежните од Јавното претпријатие „Комуналец“ кои стопанисуваат со системот за водоснабдување.
Потрошувачката на вода периодов е зголемена и не може да се покрие комплетно побарувачката.
– Високите зони од градот немаат проблеми со вода за пиење, поради направените системи за висока зона лев и висока зона десен брег на Крива Река. Поради намалената вода од изворите на Калин Камен проблем се јавува кај понискиот реон во средната зона. Се прават напори проблемот да биде решен, бидејќи нема рестрикции, но доаѓа до намален притисок на вода во домаќинствата во одредени периоди од денот, изјави Томе Тодоровски, директор на ЈП „Комуналец“.
Апелира граѓаните совесно и рационално да ја користат водата, не и за наводнување.
– Голем проблем се јавува во недела, кога во текот на целиот ден е евтина струјата и граѓаните користат можност за обавување на повеќе работи во домаќинството. Поради тоа настануваат многу дефекти во системот, пукаат линии и дополнително ја отежнуваат нашата работа, тоа е проблем кој се провлекува долго време,рече раководителот на Водовод во претпријатието, Станоја Јанкулов.