Во велешкото село Отовица денеска почна да се реализира проектот „Заштита на водите на велешкото езеро „Младост“ преку регулирање на отпадните води“.
Градоначалникот на Велес Славчо Чадиев, кој денеска изврши увид во градежните работи, информира дека новиот канализациски систем ќе биде со должина од 2,5 километри. Со системот во ова населено место ќе бидат опфатени улиците „Благој Ѓорев“ и „Гоце Делчев“, односно седум краци од нив.
– Канализацијата ќе заврши со пречистителна станица. На тој начин ќе се елиминира секаква можност за загадување на водите во езерото „Младост“ кој е рекреативен центар на жителите на Велес, Отовица и од други градови од земјава, а посетено е и од голем број од транзитните туристи, рече Чадиев.
Носител на проектот е Центарот за развој на Вардарскиот плански регион. Вкупната инвестиција изнесува 7,6 милиони денари, средства кои се обезбедени преку Програмата за рамномерен регионален развој.
– Со реализацијата на овој проект директна корист ќе имаат околу триста жители на населеното место, со што конечно ќе се реши нивниот повеќедецениски проблем. По поставување на канализацискиот систем ќе следи и проект за поврзување на селото Отовица со вода од градскиот водовод на Велес, истакна Чадиев.