Филипинскиот претседател Родриго Дутерте од Конгресот побара да се продолжи воената управа на југот на земјата до крајот на годината, изјавувајќи дека бунтот нема да биде задушен до 22 јули, кога воената управа требаше да заврши.
Воената управа Дутерте ја прогласи на 23 мај, откако терористичката група, таканаречната Исламска држава, го опколи и блокира градот Марави, на југот од Филипини, пренесоа американските медиуми.
Во писмо до Конгресот, што денеска го прочита неговиот портпарол, Дутерте напиша дека ќе треба повеќе време да се смири бунтот и побара продолжување на воената управа до 31 декември годинава.