Од понеделник ќе почне собирањето потиси за валидност на иницијативата за распишување референдум во општините Босилово и Ново Село, соопшти денеска граѓанската иницијатива „Спас за струмичката котлина – Стоп за рудникот Иловица“.
– Испративме барање до Државната изборна комисија, која ни го одобри. Од 10 јули до 14 јули граѓаните на општините Босилово и Ново Село може да одат во канцеларијата на ДИК во Струмица, која се наоѓа до градското Собрание, и со личен документ за идентификација да го дадат својот потпис за валидизација на иницијативата. За оваа процедура да оди понатаму, потребни се 100 потписи, рече Стојан Велков Трн.
На последната седница на Советот на Општина Босилово, советниците рекоа дека едногласно ќе ја поддржат иницијативата штом се валидизира.