Претресот од судскиот процес против поранешниот полицаец Јаќим Трифновски, обвинет за убиството на Бесник Шехапи и Имран Мегди, денеска беше одложен. Вештаците од психијатриската клиника бараа повеќе време за да го дополнат наодот по реконструкцијата која беше извршена минатиот месец. Дополнувањата, на извештаите од судска медицина и МВР биле готови и испратени по пошта, но до денеска не стигнале до Основниот суд Гостивар. Поради овие причини петчлениот судски совет го одложи претресот.
Што ново ќе донесат наодите по извршената реконструкција и дали ќе се утврди под какви околности Трифуновски пукал ќе биде појасно на 16-ти јануари. Во текот на судењето се појавија две верзии на настанот, едната која ја застапува одбраната, дека Трифоновски бил нападнат бил соборен и легнат кога пукал, како што тврдеше тој или пак нишанел во жртвите од стоечка позиција, како што кажуваа сведоците.
Адвокатите од двете страни оценија дека со реконструкцијата станало појасно што се случило кобниот 28 февруари. Претходно на изминатите рочишта во Основниот суд во Гостивар беа изнесени материјални докази, се сослушаа сведоците, вештаците, а своја изјава даде и обвинетиот.