Центарот за развој на претприемачи и менаџери на Македонија и УСАИД, денеска во Струмица го промовираа проектот за микро и мали претпријатија во Југоисточниот регион.
Во присисуство на градоначалникот Зоран Заев и голем број претприемачи за целите на овој проект зборуваше Татјана Марковска од Канцеларијата за економски развој при УСАИД во Македонија.
Како што истакна Марковска ова е втора година на реализација на овој проект со претприемачите и менџерите на микро и малите претпријатија.
– Овој проект е уникатна можност за обука и споделување на практични знаења и услуги за подршка на бизниси во микро и мали претпријатија. Составен дел на овој проект е и Инвес-тициски фонд, кој е подршка за почетници, но и претприемачи и менаџери кои имаат желба за проширување на својот бизнис и отварање на нови работни места, со цел намалување на број на невработените лица во Македонија, рече Марковска.
За директорот на Центарот за развој на претприемачи и менаџери, Јован Маџовски, овој проект е можност преку практични примери да им се помогне на претприемачите во нивно вклопување во економскиот живот во државата.
– Искуствата ,знаењата, вештините и алатките кои им се на располагање за подготвено започнување на микробизнисот се елементи кои им се потребни не само на почетниците, туку и на претприемачите кои во текот на своето работење наидуваат на проблеми, како во ова економска криза, така и во нормални услови на стопанисување. Подобрувањето на економичноста и создавање на здрави микро и мали претпријатија, кои ќе ја издржат конкуренцијата на пазарот, а со тоа ќе создадат и услови за нови вработувања е суштината на овој проект, рече Маџовски.
Мината година во овој проект на УСАИД биле вклучени 63 учесници, кои креирале 36 нови работни места и 74 нови можности за работа во микро и мали претпријатија.