Членовите на Советот на Источниот плански регион, кој го сочинуваат градоначалници од 11 општини од источна Македонија, на денешната седница во општина Зрновци едногласно решија новоизградениот парк на „Макфест“ во Штип да се даде на трајно користење и управување на општина Штип.
– Се работи за значаен инфраструктурен проект кој е од особено значење за општина Штип и Фестивалот на забавни мелодии „Макфест“. Паркот почнавме да го градиме минатата година и сега е целосно завршен и може да се користи. Во него се инвестирани 100 илјади евра од националниот буџет на државата, додека општината во проектот учествуваше со кофинансирање од 640 илјади денари. Работите ги изведуваше компанијата „Актива“ од Штип, изјави Драгица Здравева, директор на Источниот плански регион.
На денешната седница градоначалниците беа информирани и за текот на проектите кои се реализираат од страна на Источниот плански регион во општините Зрновци, Виница и Кочани, како и за подготовката на проекти од вториот повик за прекугранична соработка со Република Бугарија, кој ке биде објавен наскоро.