Младиот македонски поет Филип Димкоски овој месец ќе има неколку книжевни настапи во Хрватска.
Тој денеска ќе одржи час во природа со студентите од Филозофскиот факултет при Универзитетот во Загреб кои изучуваат македонски јазик. Освен поезија на Димкоски, ќе се чита поезија и од други македонски поети. Часот е по покана и во организација на професорот Инес Цебовиќ.
В понеделник во библиотеката „Август Цесарец“ во Загреб, со почеток во 18 часот ќе биде промовирана книгата „Божилак на исконот“ од Филип Димкоски и ќе бидат претставени српското и бугарското издание на книгата. Песната „И каменот има душа“ ќе биде прочитана на десет јазици, македонски, српски, бугарски, хрватски, словенечки, полски, чешки, словачки, украински и руски.
Димкоски на 9 и 10 јуни ќе настапи на Меѓународниот поетски фестивал „Морето на дланка“ што ќе се одржи во Пула и во Ровињ. Наградата за најдобра песна во регионот посветена на Ромите, што му беше доделена минатата година на Меѓународниот саем на книгата во Белград, му овозможи настап на овој фестивал.