Собранието на Република Македонија денеска напладне ќе ја започне четвртата седница на која на дневен ред се избор на членови на парламентарните комисии, како и измените и дополнувања на Изборниот законик и на законите за основно и за средно образование и за наставници во основните и средните училишта, сите по скратена постапка.
Предлог на законот за изменување и дополнување на Изборниот законик, по скратена постапка е поднесен од Оливер Спасовски, Ејуп Аљими, Африм Гаши и Весел Мемеди. Со измените на Изборниот законик се предлага изборите за членови на совет и за градоначалник наместо да се одржуваат во првата половина на мај ,да се одржуваат секоја четврта година истовремено во сите општини, во првата половина во октомври.
Измените на законите за основно и средно образование и за наставници во основните и средните училишта, сите по скратена постапка, се поднесени од пратениците од владејачкото мнозинство и со нив се предвидува укинување на екстерното тестирање на учениците.