Делегација составена од ученици и наставници од училишниот центар „Станислав Сташица“ од градот Новогард од Република Полска, од денеска се во посета на Општина Велес. Посетата е дел од соработката со збратименото ССОУ „Коле Неделковски“ од Велес.
Тие остварија средба и со градоначалникот Славчо Чадиев, кој истакна дека целта е подобра соработка меѓу двете земји посебно меѓу младите, а им посака пријатен престој и подобро да го запознаат Велес и неговите граѓани.
-Сакам да направите добри спомени со кои ќе се вратите дома. Ваква посета на ученици од Полска се реализира по седми пат и задоволство ми е да оценам досега немало никави проблеми и очекувам така и да остане, истакна Чадиев.
Како што информираат од Општина Велес соработката со Новогард која трае осум години вклучува посета на учениците од Полска во Велес и обратно.
Освен училиштата таа се прошири и помеѓу Општина Велес и Полскиот град Новогард, како и Вардарскиот плански регион и регионот Голенов.
Истовремено со оваа посета ученици од ССОУ „Коле Неделковски“ деновиве се во Полска. Како што истакнуваат од Општина Велес, една од главните цели на оваа соработка е унапредување на наставниот процес и примена на добрите образовни практики.