Општина Куманово по втор пат го распиша конкурсот за избор за најдобра фотографија со мотиви од Куманово – „Мое Куманово“.
Конкурсот се распишува бидејќи на првиот оглас не се пријавиле доволен број заинтересирани учесници, соопштија надлежните од одделението за локален економски развој од oпштината. Kонкурсот се распишува врз основа на програмата за општа туристичка пропаганда и за подобрување на условите за престој на туристите во Општина Куманово.
Општината ги поканува сите заинтересирани професионалци и аматери да се пријават со свои авторски фотографии согласно утврдените критериуми. Фотографиите треба да бидат со мотиви од Општина Куманово, панорамски фотографии, ноќна фотографија , знаменитости, занаетчиство, инфраструктура, јавни објекти, манифестации, спортски и културни настани. Еден автор може да достави и повеќе од една фотографија.
На конкурсот ќе бидат доделени три награди за најдобра фотографија од 15.000, 10.000, и за трето место 5.000 денари. Фотографиите треба да се достават во затворен плик, најдоцна до 5 јуни, годинава.