Русија во Советот за безбедност на ОН поднесе предлог резолуција за поддршка на меморандумот за создавање зони за деескалација во Сирија, што беше потпишан на минатонеделната меѓународна средба во Астана, јави ТАСС.
Гласањето за документот може да се оддржи веќе денеска или утре, наведуваат дипломати.
На преговорите во Астана делегациите на Русија, Иран и Турција се договорија за создавање четири зони за деескалација на сириската територија. Во овие зони влегуваат провинцијата Идлиб и некои делови од соседните провинции Алепо, Латакија и Хама, регионот северно од градот Хомс, како и Источна Гута и јужните провинции Дераа и Кунејтра.
Спогодбата предвидува во овие зони од 6 мај да се воведе забрана за воена активност, вклучувајќи и летови на авијацијата.