Избегнувајте производи во оштетени, нагмечени, надуени или напукнати конзерви, тегли, кутии и други амбалажи, не купувајте готови јадења кои стојат во откриени садови, разделувајте ја зготвената од суровата храна, добро измијте ги овошјето и зеленчукот.
Ова се само дел од препораките на Агенцијата за храна и ветеринарство (АХВ) според која, здравјето влегува низ уста и затоа треба исклучително да се внимава како, каде и што јадеме.
Особено е битно, велат од АХВ, кога пазарат, купувачите да го читаат означувањето на производите, а ако јадат надвор од дома и евентуално се посомневаат во исправноста или безбедноста на храната, да направат друг избор.
– Секогаш внимавајте, лицето кое ја приготвува или послужува храната правилно да ракува со неа. Во маркетите, пак, кога купувате, читајте го означувањето на производите. Согласно постојниот Правилник, тоа треба да биде јасно видливо и разбирливо, со прецизно наведени алергени, адитиви, витамини, минерали,… Практично ги дава сите неопходни информации за составот и начинот на чување на храната, рокот на употреба, нето тежината или волуменот,…, врз основа на кои потрошувачот може да изврши правилен избор, велат од Агенцијата.
Во Македонија постојано се спроведуваат кампањи за здрава храна и тие се најчесто поддржани или реализирани од АХВ. Во една од нив, „Безбедна храна за здрава иднина“, опфатени се повеќе сегменти: препораки за миење раце пред секое јадење, „паметно“ порачување кога се храниме надвор од дома, совети за транспорт на храна и препознавање симптоми на болести предизвикани од храна.