Во Собранието на Република Македонија денеска седници ќе одржат Комисијата за финансирање и буџет, Комисијата за европски прашања и Законодавно правната комисија.
Комисија за финансирање и буџет денеска ќе ја продолжи расправата по Предлог-буџетот на Република Македонија за 2013 година.
Единствена точка на дневниот ред на Комисијата за европски прашања е Предлог-законот за изменување и дополнување на Законот за задолжително капитално финансирано пензиско осигурување – прво читање.
Законодавно-правната комисија, пак, ќе одржи две седници на кои ќе расправа за Предлог-буџетот на Република Македонија за 2013 година, како и за Предлог-законот за дополнување на Законот за пензиското и инвалидското осигурување и измените и дополнувањата на Законот за социјалната заштита, двата по скратена постапка и во второ читање, за Предлог-законот за упатување работници од Република Македонија во други држави за изведување градежни работи преку проектни договори и за вршење други сезонски работи, во второ читање, Предлог-законот за изменување и дополнување на Законот за евиденциите од областа на трудот, второ читање, измените и дополнувањата на Законот за агенциите за привремени вработувања, прво читање.
На дневен ред на оваа Комисија се и измените и дополнувањата на Законот за работните односи, на Законот за задолжително капитално финансирано пензиско осигурување, на Законот за доброволно капитално финансирано пензиско осигурување, како и Предлог на закон за материјално обезбедување на невработени лица поради приватизација на претпријатијата со општествена и државна сопственост поднесен од опозицијата, сите во прво читање.