Со изведба на танци, песни, драматуршки рецитати и спортски игри, учениците од ООУ „Вера Циривири Трена“ денеска го одбележаа Меѓународниот ден на спортот и мирот. Трета година по ред Општина Карпош го празнува овој светски признат ден на спортот. Основците од ова училиште, ја истакнуваа важноста од занимавањето со спорт, и колку спортот влијае на психофизичкиот развој на едно младо дете. Раководителот на одделението за спорт и култура при Општина Карпош Патрик Поповски, нагласи дека локалната самоуправа, вложува постојано во спортското здравје на учениците, потенцирајќи дека Општина Карпош е позната по одржувањето на училишните спортски лиги во фудбал, кошарка, ракомет и одбојка.
Ние како локална самоуправа, му придаваме големо значење на спортот како физичка активност преку која младите основци ќе се изградат во здрави личности.Особено сме горди, што токму ученици кои учеле во некое од училиштата кои се наоѓаат на територијата на Карпош, денес се врвни спортисти, било во индивидуалните или во некој колективен спорт. Практикувањето на спортска активност освен што позитивно влијае врз психофизичкиот раст и развој на основците, исто така им создава дисциплина, почитување на ред, преземање на одговорност и чувство на припадност кон колектив, напомена Поповски.
Локалната самоуправа и во иднина, ќе го одбележува овој Ден на спортот и мирот, преку организирање на пригодни настани, со кои освен што ќе се даде на значење на спортот, исто така ќе се мотивираат што повеќе деца и млади основци да се занимават со спортот како хоби или професионална активност.