Со едукација и предавања за членовите, спортско-планинарскиот клуб „Козјак“ денеска ќе го одбележи Меѓународниот ден на планинари.
Членовите на „Козјак“ учествуваа и на традиционалното искачување Матка кое се оддржа викендов, во организација на Федерацијата за планинарски спортови на Македонија (ФПСМ) и Градот Скопје по повод Светскиот ден на планината.
– Планинари од нашиот клуб пешачеа 18 километри, а останатите, претежно помлади членови, ја поминаа планинарската патека до четирите манастири, ја посетија и пештерата „Врело“, вели секретарот на Клубот Мартин Величковски.
Во СПК „Козјак“ членуваат 58 активни и 29 пасивни планинари. Клубот учествува на сите традиционаллни искачувања на планинските врвови во државата и надвор од неа. Досега планинарите ги освоиле највисоките врвови на Балканот, а во изминатите години, учествуваа и на искачувања во Европа. Планинарите соработуваат со сите македонски планинарски друштва, но и со планинари од Балканот. Во рамки на клубот функционира и школата за млади планинари. СПК „Козјак“ има еден планинарски дом во Длабочица.