Владата донесе мерки за измена на Законот за странци во насока на овозможување на странските државјани да добијат поголем временски интервал за престој во Република Македонија и за измена на уредбата за добивање на државјанство.
Двете мерки, нагласи на денешната прес-конференцијата владиниот портпарол Александар Ѓорѓиев, се во насока на привлекување странски капитал и за овозможување и олеснување на реализација на инвестициите од странство.
Тој посочи дека целта е реално олеснување на процедурите и стимулација на странските државјани за одлуката за инвестиции на средства во Македонија.
Досегашните податоци, истакна Ѓорѓиев, говорат дека развојот на оваа дејност односно купување од странци на имот во Република Македонија е извонредно многу мал.
– Проценките се дека со ограничувањата кои ќе бидат симнати со измената на овие закони ќе се зголеми атрактивноста на понудата, а и преку анимацијата преку дипломатско конзуларните претставништва на Македонија и директната презентација на овие информации преку економските промотори, роуд шоуата на странските пазари на недвижности, се очекува дека со усвојувањето на измените и веќе во почетокот на следната година би имале првични влезови на капитал во оваа дејност затоа што и при многубројните посети што се правени од страна на владините претставници или пак информациите што ги добиваме од економските промотори говорат дека Република Македонија е атрактивна за странците за купување имот, куќа или стан, рече Ѓорѓиев.
Но, додаде владиниот портпарол, за точната бројка не би можеле да даваме конкретна проекција, но се очекува дека ќе има сериозен напредок во оваа дејност од што корист ќе имаат граѓаните.