Во близина на некогашниот хотел Парк во Охрид беше отворен Паркот на пријателството, каде дрвца засадија градоначалници и претставници на неколку градови со кои Охрид е збратимен.
Под секое засадено дрво, стои плоча на која го пишува името на општината која на тоа место засади дрво.
Според присутните градоначалници од неколку општини од поранешните Југословенски простори и соседната општина Подградец во Албанија, ова е добар знак дека градовите можат да соработуваат многу повеќе од државите и оти повеќе не постојат препреки за соработка и подобра комуникација.
Сличен ваков парк на пријателството има во хрватскиот град Трогир.
„Ние преку овој парк сакаме да пратиме една порака преку Свети Климент до цела Европа дека пријателството, соработката и културниот натпревар меѓу народите е најважната работа што треба да ја правиме“ рече Петрески.
Охрид од денес и официјално е збратимен и со српската општина Инџија.Беше потпишана повелба за братимување, откако пред неколку дена двата совети го потврдија меѓусебното збратимување.
„Сигурен сум во тоа дека нашите општини има многу што да научат една од друга.Инџија во Србија е лидер кога се во прашање странските инвестиции, додека Охрид лидер во Македонија во туризмот и културата.Јас сум сигурен дека и во иднина ќе соработуване, но она што е уште поважно дека граѓаните на Охрид и Инџија ќе имаат можност да соработуваат на сите нивоа“, рече градоначалникот на Инџија Петар Филиповиќ.