На крводарителскатa акција што се одржа денеска во големата сала при локалната самоуправа на општина Крива Паланка се собрани 69 единици крв.
Ова е прва акција во февруари, а трета годинава во организација на општинска организација на Црвениот крст во Крива Паланка.
– Во јануари на две крводарителски акции беа собрани 87 крвни единици на подрачјето на Крива Паланка и Ранковце, а заедно со денешната се вкупно 156. Денес на сите хумани граѓани кои даруваа крв, а се оѕваа во голем број, ќе им бидат направени и био-хемиски анализи на крвта, информира Дарко Пешовски, секретар на ОО Црвен крст – Крива Паланка.
Акцијата се реализира во соработка со Институт за трансфузиона медицина – Скопје. Согласно Планот за крводарувања годинава предвидено е на територијата на двете општини да бидат собрани 711 единици крв. Следната акција е закажана за 14 февруари.