„Недозволиво за еден градоначалник и една локална власт е да го загрозат здравјето на своите сограѓани. Тоа го направија Ивица Конески и советниците од ВМРО-ДПМНЕ во општината Аеродром со тендер политиките што се одразија со огромна загаденост на воздухот во општината.
Граѓаните на Аеродром дишат отровен воздух. Со месеци и навечер и наутро концентрациите на опасните ПМ10 честички се и до 20 пати над дозволените граници. Аеродром е меѓу најзагадените општини во Македонија и во Европа.
Конески и локалната власт не смеат да се кријат во овие денови на огромно загадување, кога граѓаните се загрижени за своето здравје и за нивните деца!
Бараме од Конески проблемот со големото загадување во Аеродром да го постави на централно ниво и да им каже на граѓаните дали и како ќе се справат со овој проблем што го предизвикаа.
Ивица Конески и советниците од ВМРО-ДПМНЕ ги исекоа сите паркови и зелени површини во Аеродром и за тендер интереси поставија непотребен бетон каде стигнаа. Дозволија да се градат згради една до друга со што ја нарушија природната циркулација на воздухот. Должни се да се справат со последиците!
Укажуваме дека криминалните власти од ВМРО-ДПМНЕ секојдневно вршат убиство од небрежност врз граѓаните на Општина Аеродром и дека за последиците ќе има одговорност!
Несовесното и коруптивно владеење на ВМРО-ДПМНЕ и на Ивица Коневски, е казнето од граѓаните кои избраа промени. По промените на парламентарните избори ќе следуваат промени и на локалните избори, бидеки граѓаните сакаат живот и одговорни власти коишто ќе водат реални политики и ќе се грижат за нивните реални потреби“, изјави Златко Марин, претседател на ОО СДСМ Аеродром.