Организаторите на Олимписките игри во Токио 2020 година одлучиле дека медалите кои ќе ги делат на Олимписките игри и на Параолимпијадата ќе бидат направени од рециклирани мобилни телефони.
Тие упатиле повик до јапонците да ги донираат своите стари мобилни телефони како би собрале два тони злато, сребро и бронза, колку што се потребни за изработка на повеќе од 5.000 олимписки медали.
„Проектот е добар од повеќе причини – ќе им овозможи на жителите на Јапонија да се вклучат во организација на игрите, ќе се рециклираат телефоните со што помагаме во зачувавање на животната средина, а да не зборуваме за заштедата што ќе се оствари“ истакна директорот на Олимпискиот одбор Коџи Мурофуши.
Од април во сите јапонски градови ќе бидат поставени кутии со логото на игрите во кои ќе може да се остават старите уреди.