Доколку Претседателот Иванов се држи до Уставот, мандатот треба да го довери на втората партија која освоила најмногу гласови, а тоа е СДСМ, при што претходно треба да направи консултација да се види дали партијата има обезбедено мнозинство во Собранието односно дали има 61 пратеник за да се избере Влада. Ако има такво сознание, во разговор со ДУИ и другите преставници од албанскиот блок, треба самите да се јават и на некој начин да го ограничат Иванов да мора да им го довери мандатот, вели за А1он Уставниот судија, Трендафил Ивановски.
Тој смета дека доделување на мандатот е обврска и должност на Иванов и дека сето ова беспотребно одолговлекување и чекање до крајните рокови претставува малтретирање на народот.
– Уште денес Груевски треба да го врати мандатот и веднаш потоа Иванов да го додели на СДСМ, тие со намера одолговлекуваат, но од гарнитура која го руши Уставот и државата може се да се очекува, вели Ивановски.
Поранешниот уставен судија предвидува ново сценарио од страна на ВМРО-ДПМНЕ, а тоа е да го доверат мандатот на некој од истата партија што би значело кршење на Уставот и подигрување со народот како и обид со сила да ја задржат власта и да го правдаат криминалот кој го направиле.
Виктор Јованов