Со филмот „Среќата никогаш не доаѓа сама“ во режија на Џејмс Ит, снимен во 2012, со Софи Марсо и Гад Елмале во улогите, вечер во кино „Миленум“ ќе биде отворена Неделата на француски филм.
На минифестивалот, што го организираат Францускиот институт во Скопје и Младинскиот културен центар, од утре до 9-ти декември во кино „Фросина“ ќе има проекции на уште четири филма од најновата француска кинематографија.
Утре ќе биде прикажан „Име“ на режисерот Александар де ла Пателиер (2012), в сабота од 20 и од 22 часот се „Љубовџии“ на Риад Сатуф (2009) и „Госпоѓица Шамбон“ во режија на Стефан Бризе (2009), а во недела, за затворањето на манифестацијата, ќе биде прикажан филмот „Верно на оригиналот“ на Абас Кјаростами (2010).