Глобалните закани предизвикани со војната во Сирија се многу опасни за да поминат нерешени, изјави генералниот секретар на ОН, Антонио Гутереш, укажувајќи на потребата од напредок во мировните преговори следната недела.
Тој на прес-конференција во Женева истакна дека конфликтот во Сирија предизвикал нестабилност на Блискиот исток, како и терористички напади ширум светот.
– Последиците од овој конфликт станаа премногу опасни за сите, додаде Гутереш, изразувајќи надеж дека преговорите во Астана ќе доведат до консолидирање на прекин на огнот и замрзнување на конфликтот.
Мировните преговори меѓу противниците треба да почнат в понеделник во главниот град на Казахстан, со посредство на Русија и Турција, а не ОН.
Ова е втора официјална посета на Гутереш на Женева откако стапи на функција на 1 јануари, а денеска треба да оствари средба со кинескиот претседател Си Џинпинг.