Венецуелскиот претседател Николас Мадуро ја зголеми за 50 отсто минималната плата и пензија во земјата, петти пат за една година.
Целта на ваквата одлука на Мадуро е да бидат заштитени работниците од највисоката инфлација во светот.
Шефот на државата вчера изјави дека месечната плата ќе достигне до вкупно 104.358 боливари, или околу 30 долари на црниот пазар. Минималната плата е зголемена за 40.683 боливари.
Мадуро ја најави оваа мерка во момент кога се обидува да ја убеди опозицијата, која има мнозинство во Парламентот, да се откаже од обидите да го собори од власт и да го продолжи учеството во преговорите со посредништво на Ватикан за надминување на политичката и економската криза во Венецуела.