Европската комисија (ЕК) ги нотира прелиминарните резултатите и одлуките кои Државната изборната комисија (ДИК ) ги направи по приговорите, но постои загриженост поради тензиите во последните неколку дена како и поради негативната реторика, велат од ЕК за Макфакс.
„ЕК ги нотира прелиминарните резултати и одлуките по приговорите, и сега ги чека одговорите на жалбите. Релевантните државни власти, вклучувајќи ги тука Државната изборна комисија и судовите, треба да работат непречено, слободни од притисоци и политичко мешање. Загрижени сме поради тензиите во последните неколку дена, како и поради негативната реторика. Комисијата ги повикува сите засегнати страни да се однесуваат одговорно и да придонесат за враќањето на довербата на граѓаните во државните институции и демократските процеси“, изјави за Макфакс портпаролката на ЕК, Маја Коцијанчич.
Таа додаде дека ЕК очекува брзо формирање на новиот состав на Парламентот, како и на новата Влада. „Го очекуваме брзото формирање на новиот состав на парламентот и новата влада, како и имплементацијата на реформите неопходни за решавање на системските прашања во поглед на владеењето на правото, исто така преку Итните реформски приоритети и продолжeната имплементација на претходните политички договори. ЕК ќе продолжи да ја поддржува земјата во евроинтеграциите“, порачуваат од Европската комисија.