Друштвото на писателите на Македонија денеска со манифестацијата „Средба на генерации“ ќе ја одбележи 95-годишнината од раѓањето на поетот, раскажувач, есеист, филолог, книжевен научник и преведувач, творец и научник и прв претседател на македонската писателска асоцијација Блаже Конески.
Пред љубителите на литературата и почитувачките на делото на Блаже Конески, на Педагошкиот факултет „Свети Климент Охридски“ во Скопје ќе настапат 20 поети на ДПМ од различни генерации.
Средбата ќе ја отвори деканот на Педагошкиот факултет проф. д-р Емил Сулејмани, а за поетското послание на Блаже Конески ќе зборува претседателот на ДПМ Веле Смилевски.
Во рамки на „Деновите на Блаже Конески“, кои ДПМ традиционално ги одржува по повод годишнината од раѓањето на поетот, на 16 овој месец писатели за деца настапија во Основното училиште „Блаже Конески“ во Скопје.
На веб страницата на Друштвото на писателите на Македонија (www.dpm-pisateli.mk) е објавен избор од творештвото на поетот во кој се поставени и фотографии, како и факсимили на песни напишани со раката на Блаже Конески.
Друштвото на писателите на Македонија минатата година го востанови признанието „Повелба Блаже Конески“. Прв добитник беше поетот и академик Матеја Матевски.