Министерот за одбрана на Република Македонија Зоран Јолевски денеска, по повод празникот Свети Климент Охридски, упати честитка до вработените во Министерството за одбрана, припадниците на Армијата на Република Македонија и до граѓаните на Република Македонија.
– Чествувањето на денешниот празник Св. Климент Охридски, значи чествување на нашиот јазик, нашата писменост, нашата култура, како основа за нашето постоење. Делото на Св. Климент Охридски ни овозможи да го достигнеме и зацврстиме нашето место во современата цивилизација, како народ и нација кои го препознаваат суштинското влијание на образованието и писменоста во развојот на секој поединец, стои во честитката.
Министерството за одбрана и АРМ, додава Јолевски, големо внимание посветуваат на личниот развој, континуираната едукација, дообразованието и обуката на своите вработени.
– Наш приоритет е и развојот на Воената академија, која низ годините, успеа да се етаблира како врвен регионален едукативен центар и јас како министер, сум исклучително горд на тоа. Нашата верба во образовните институции, нашиот влог во нив, значат и почитување и продолжување на делото на Св. Климент. Со тоа ние ја продолжуваме и благородната мисија на нашиот патрон кој својот живот го посветил на писменоста, наведува Јолевски.