Агенцијата за вработување денеска организираше Отворени денови во Кавадарци. Во рамки на акцијата, директорот на Агенцијата Влатко Поповски се сретна со работодавачи и невработени од овој регион.
– Во наредниот период дел од сугестиите ние ќе ги ставиме во оперативниот план. Ги повикувам и граѓаните на Кавадарци и околината, доколку имаат некоја идеја за нова мерка, начин или постапка, идеја да видоизмениме некоја мерка за таа да е уште поприфатлива за граѓаните, да ги достават до Центарот за вработување или пак на нашата електронска адреса. Секој од тие предлози или сугестии сериозно ќе ги земеме предвид за да ги имплементираме. Сега е време секој оној кој сака да сугерира дека некаде грешиме да достави мерки за да ги направиме соодветни на практиките, рече Поповски.
Средбата се одржа во новите простории на Агенцијата за вработување во Кавадарци, реновирани со грант од ЕУ. Тие сега како што додаде директорот, ги задоволуваат потребите за интервјуа, предавања, работилници и друго.
Раководителот на Центарот за вработување Кавадарци Благојчо Борисов информираше дека од 2006 година наваму, со активните мерки има околу 3.500 вработувања. -Интересот е голем и им излегуваме во пресрет на сите. Во текот на една година има повеке мерки со разна динамика. И во 2017 година исто така има најавено мерки кои ќе ги спроведеме. Самовработувањето е едно од најпосакуваните. Од 2010 до денес невработеноста се намалува по 1 отсто годишно, нагласи Борисов.