Дополнителниот заменик министер за информатичко општество и администрација Александар Кирацовски до Државниот инспекторат за труд поднесе иницијатива за поведување постапка за вонреден инспекциски надзор над работењето на институциите од каде добил информации за голем број нерегуларности.
Иницијативата, како што информираат од неговиот Кабинет, доаѓа по, како што велат, ослободувањето од работа на голем број вработени од државните институции и општини со цел да се упатат на митингот на ВМРО-ДПМНЕ во Охрид.
– Го повикуваме Државниот инспекторат за труд соодветно да постапи по иницијативата, со цел еднаш засекогаш да се стави крај на злоупотребите на вработените во јавниот сектор, кој што се користи за партиско политички интереси. Сите прекршувања на законските норми каде што со партиско и политичко дејствување се влијае врз вработените, а со тоа се попречува правото на слободно изразување на волјата на граѓаните, ќе бидат соодветно санкционирани, велат од Кабинетот на дополнителниот заменик на министерот за информатичко општество и администрација.