Во рамки на 15. Фестивал на европски филм „Синедејс“, денеска во Младинскиот културен центар ќе се одржи презентација на потпрограмата МЕДИА на „Креативна Европа“ и работилница за сценарио на Арне Колвајер. Организатори се Канцеларијата на „Креативна Европа“ за потпрограмата МЕДИА, Агенцијата за филм на РМ и тренинг-програмата Мидпоинт од Чешка.
Работилницата „Одбрани алатки за драматургија: Градење на внатрешниот живот на ликот“ која ќе ја одржи Колвајер има цел да ги открие сложените внатрешни емоции на ликот, како една од најтешките задачи со кои се соочуваат филмските работници.
Арне Колвајер (1981) ги завршил студиите по филмска режија на ФАМУ во Прага. Претходно студирал фотографија во Грац, литература во Франкфурт на Одра, и теорија на филм на Универзитетот во Гетеборг. Има снимено повеќе кратки филмови и режирано за германските телевизии. Член е на Германското здружение на сценаристи од 2010 година.
Живее и работи како независен сценарист, режисер, консултант за сценарија и професор на семинари во Берлин, каде што од 2011 година раководи со Станицата за сценарија (проектна лабораторија за сценаристи на програмата Таленти на Берлинале). Исто така е раководител за развој во продукциската куќа „42филм“ во Хале и е задолжен за меѓународни копродукции.