За 160 отсто е зголемен извозот на Македонија во Унгарија во првите седум месеци од годинава, а и размената од двете страни континуирано бележи раст, беше речено на македонско-унгарскиот деловен форум што се одржува денеска во рамки на „Технома 2016“.
Форумот на едно место ги собра бизнисмените од двете земји кои, како што рекоа организаторите – Сојузот на стопанските комори (ССК) и Амбасадата на Унгарија, имаат директна можност да договорат соработка и да поразговараат за реализирање заеднички проекти.
Најголем потенцијал има во туризмот, екологијата и културата, иако засега размената главно се сведува на готови производи во машинската, односно преработувачката индустрија.
– Македонија и Унгарија традиционално, имаат одлични политички и економски односи, а одлично ја негуваат и соработката во културата, спортот, како и во останатите сфери. Меѓу двете земји нема никакви пречки, а потенцијалот за соработка е голем, посебно во делот на малите и средните претпријатија, истакна унгарскиот амбасадор Ласло Дукс, потенцирајќи ја контиунираната унгарска поддршка за македонските ервоинтеграциски процеси.
Според него, двете земји во унапредувањето на македонско-унгарските бизнис релации гледаат и добра можност за искористување пари од европските фондови преку претходно заедничко аплицирање.
Трансферот на знаења и технологии, како и иновациите се во фокусот на унгарската економија, а тоа, подвлече амбасадорот, се пресликува и во економоските односи со Македонија.
– Македонија на домашните и странските инвеститори им нуди многу бенефиции, има одлична инфраструктура и локација, овозможува брз, лесен излез на европскиот пазар, а нуди и квалификувана, образована работна сила, рече Маја Костова од Агенцијата за инвестиции и промоција на извозот која се осврна на предностите кои ги нуди земјава за водење бизнис.
Според Секторот за трговија при Унгарската амбасада во Скопје, за развој на економските односи во 2012 година е формирана меѓувладина комисија која досега одржала три средби, а етаблирани се и повеќе од 20 форми на соработка.