„Оваа расправа за ребалансот на Буџетот е наменска расправа и се однесува на обезбедување за парични средства за обесштетување на граѓаните кои претрпеа штети по својот имот во поплавите.
СДСМ заедно со коалиционите партнери се реши приоритетот да го даде на интересите на граѓаните и да го искажеме нашиот став во однос на истиот, се со цел да се овозможи од утре да почне исплатата на штетата на граѓаните од Скопје и од Тетово.
Се надевам дека веќе од утре Министерството за финансии е спремно и ќе почне да ги обесштетува граѓаните.
Голем број од граѓаните немаат елементарни услови за живот.
Немаат свои домови, куќите им се распукани, немаат кревети, инсталацијата е уништена.
Ние сме сведоци дека за жал се уште постојат граѓани кои што не ги примиле ни овие 500 евра.
Бараме на неделна основа да го објавувате списокот на сите граѓани на кои што им била проценета штетата и истата им била исплатена.
На тој начин ќе сакаме да има увид дали исплатата на штетата се врши транспарентно, неселективно и без никакви условувања од било која страна.
Ви предложивме да се откажете од стиропорните фасади на владините згради и другите државни органи.
Ви предложивме да се откажете од ставката економски маркетинг и промоција, и тие пари во износ од 7 милиони евра да ги пренамените за обештетување на поплавените.
Ви предложивме да се откажете и од трошењата за зградите на Министерството за финансии и Министерството за правда. Вие не сакавте да се откажете.
Како што `се во оваа држава сакате да го направите со кредит, така и обесштетувањето сакате да го направите на кредит.
Оваа влада можеше да ги обесштети граѓаните само од два проекти. Требаше само да се откаже од фамозното Панорамско тркало и Рајската градина од Аеродром од 15 милиони евра. Нема никаква логика вие да градите Панорамско тркало и Рајска градина кога 20.000 граѓани нема каде да живеат и не знаат како ќе презимат во овие месеци кои што доаѓаат.
На кого ќе му е потребна Рајската градина?
Ребалансот да го изгасаме денеска, од утре да почне исплатата, а веќе наредниот ден да продолжиме со барање на одговори на прашањата за одговорноста и дали не можеше да се спречи да нема толку жртви од овие поплави“, рече пратеникот Марјанчо Николов.